Туймазыда фаҗига: 13, 15 һәм 17 яшьлек малайлар машина урлап авариягә очраган
Башкортстанның Туймазы шәһәрендә урланган машинада авариягә очрап үлгән 13 яшьлек малай балалар йортында үскән, балигъ булмаган яшьтәгеләр эшләре буенча хисапта торган. Бу турыда «Башинформ» үз чыганакларына сылтама белән хәбәр итте.
«Балалар йортында үскән 13 һәм 15 яшьлек ике үсмер, аларның 17 яшьлек иптәше төнлә Туймазы урамында йөри. Кече малай ишеге бераз ачык калган, эчендә ачкычы торган машинаны күреп ала. Аны хатын-кыз йөртүче калдырып киткән. Малайлар озак уйлап тормый, машинаны алып китә. Кызганычка, бу фаҗига белән тәмамлана», – дигән сайт чыганагы.
Узган төндә «ВАЗ-2110» машинасы юл кырыена төшеп китә һәм каплана. Машина белән идарә итүче 13 яшьлек малай урында ук үлә. Тагын ике малай имгәнгән, аларны хастаханәгә илткәннәр. Икесенең дә хәле уртача авырлыкта.
Әлеге эшне прокуратура тикшерә, диелә хәбәрдә.