Тĕллевлĕ пулăшмалла
.jpg)
Канаш районĕнчи Сухайкасси ял тăрăхĕ Раççейри «Чи лайăх муниципаллă практика» конкурсра каллех палăрнă. Кăçал вĕсем «Хула хуçалăхне цифра технологийĕсене пурнăçа кĕртесси» номинацин 2-мĕш категорийĕнче виççĕмĕш вырăн йышăннă. Ял тăрăхне 6 миллион ытла тенкĕ парса чыслаççĕ. Правительство çуртĕнче тунтикунсерен иртекен ларăва Чăваш Республикин Пуçлăхĕ Олег Николаев çак хыпартан пуçларĕ. Çавăн пекех Олег Алексеевич ятарлă çар операцине хутшăнакансен тĕлĕшпе мĕнле тĕревсем пулни пирки те чарăнса тăчĕ.
Ятарлă çар операцине хутшăнакансене пулăшмалла Чăваш Республикин резерв фондĕнчен 100 миллион ытла тенкĕ куçарнă. Чăваш Енре пурăнакансем те салтаксене хастаррăн пулăшаççĕ. Çакна «Пĕрле» аталану фончĕ укçапа тулни те çирĕплетет. Мобилизаци пырса тивнĕ арçынсене хӳтĕлев хатĕрĕсемпе тивĕçтерме фонд укçа пухассине авăн уйăхĕн 27-мĕшĕнче кăна пĕлтерчĕ, халĕ пухмачра 23 миллион тенкĕ пур та. Республикăра «Хамăрăннисене пăрахмастпăр» ятпа ыркăмăллăх концерчĕсем иртрĕç. Унта пухăннă укçана, вăл вара çур миллион тенкĕпе танлашать, пĕтĕмпех «Пĕрле» фонд счечĕ çине куçарса параççĕ.
Хĕрарăмсем те пуçарулăхпа палăраççĕ. Вĕсем ăшă алсиш-нуски çыхаççĕ, управçă сăмса тутрисем тĕрлеççĕ тата ытти те. Мобилизациленисене кӳрекен пулăшу анлăланни пирки те чарăнса тăчĕ Чăваш Республикин Пуçлăхĕ Олег Николаев. Вăл юпа уйăхĕн 10-мĕшĕнче кун пирки Хушу та кăларнăччĕ. Çĕршыв хӳтĕлевçисен ачисем вĕренеççĕ пулсан вĕсене кунне икĕ хутчен тӳлевсĕр вĕри апатпа тивĕçтермелле. Ку çеç те мар, вĕсене тата уйăхсерен стипенди параççĕ. Вăл 2 пин тенкĕпе танлашать. Кружоксене, секцисене çӳреме, ытти хушма вĕрентӳ программисемпе ăс пухма та вĕсен майсем пулĕç. Салтаксен çемйисене тӳлевсĕр юрист пулăшăвĕпе тивĕçтереççĕ, енчен те ниçта та вăй хумаççĕ пулсан ĕç вырăнĕ тупма пулăшаççĕ. Газ кĕртессипе ĕçсем пурнăçланă чухне те тĕрев лекет. Кăçал кăвак çулăм мĕнле çуннине тишкерекен хатĕр туянсан тăкакланнин пĕр пайне каялла тавăрса парĕç. Олег Алексеевич район тата хула ертӳçисене çак тĕревсене вырăнта мĕнле пурнăçланине тишкерсех тăмаллине каларĕ.