Асăрхануллăрах пулмалла
Раççей Федерацийĕнче 51 хутчен кайăк-кĕшĕк грипĕ, 558 вырăнта уртаракан чир, 116 хутчен сыснасен африка чуми пулнине шута илнĕ. Ку кăçалхи 9 уйăхри кăтарту. Чăваш Енре ку енпе мĕнле лару-тăру пулнине Правительство çуртĕнчи ларура тишкерчĕç.
Çулталăк пуçланнăранпа Чăваш Енре 4 тăрăхра уртаракан чир пулнине палăртнă. Пĕр тĕслĕхре тискер чĕрчун, виççĕшĕнче килти выльăх çак амака çаклатнă. Уртаракан чире юлашки хут республикăра юпа уйăхĕн 18-мĕшĕнче Канаш районĕнче тупнă. Çĕнĕ Юнтапа ялĕнче пурăнакан хĕрӳ линие килти йытти чирлени пирки шăнкăравласа пĕлтернĕ. Тăватă ураллă тусĕ йăшни 5 кун çитнĕ. Уйăх маларах йытăн тилĕпе çыхăну пулнă иккен. Чăваш Республикин Пуçлăхĕн йышăнăвĕпе юпа уйăхĕн 21-мĕшĕнчен Канаш районĕнче – карантин. Вăл икĕ уйăха тăсăлать. Карантин тапхăрĕнче йытăсене, кушаксене ял тулашне кăлармалла мар. Выльăх-чĕрлĕхпе çыхăннă нимĕнле курав та йĕркелеме юрамасть.
Çĕнĕ Юнтапа ялĕнче пурăнакансен икĕ уйăхлăха тискер чĕрчун тытма сунара каясси, килти выльăх-черлĕхпе çула тухасси пирки манмалла. Республикăри патшалăх ветеринари службин ĕçченĕсем паян чир вучахне пĕтерессипе, амак чир маллалла ан сарăлтăр тесе тăрăшаççĕ. Кунта çакна та палăртса хăвармалла, килти выльăха уртаракан чиртен вакцинацие тӳлевсĕр тăваççĕ. Чăваш Енре 360 000 пуç выльăха ку енпе укол тунă. Тискер чĕр чун пухăнакан вырăнсене утă уйăхĕнче 26 000 доза апатпа пĕрле эмел хурса панă. Кайăк-кĕшĕк грипĕ ан сарăлтăр тесе те республикăра нумай ĕçлеççĕ. Кăçал 9 уйăхра 5421 кайăк-кĕшĕке тĕрĕсленĕ. Вĕсенчен 5202-шĕ – килтисем. Тĕпчев вĕçен кайăксен грипп çуккине кăтартнă. Раççейре кăçал сыснасен африка чуми пуррине час-час шута илнĕ. Чăваш Республикипе чикĕллĕ регионсенче те ку мура тупса палăртнă. Тутар республикипе Чулхула облаçĕнче ку енпе лару-тăру япăхрах. Çак асăрхануллăрах пулмаллине кăтартать. Патăрьел, Елчĕк, Çĕрпӳ районĕсенчи пысăк комплекссем патĕнче юлашки вăхăтра хир сыснисене курма пулать. Канашлăва хутшăнакансем тискер чĕрчунсен йышне тишкермеллине, кирлĕ пулсан вĕсене чакарассипе мероприятисем ирттермеллине каларĕç.