«Атып үтергән һәм гәүдәләрен трассада калдырган»: Ике кешене үтергән аучыны хөкем итәләр
Хабаровск краенда 1 ел элек кылынган җинаять эшен тикшерү дәвам итә. Билгеле булганча, Николаевск районында 2 кешене трассада атып үтерәләр, гәүдәләрен шунда ук калдыралар. Тикшерү версиясе буенча, җинаятьне 36 яшьлек җирле кеше кылган. Ул юлдан килүче машинаны туктата. Машинада 2 ир-ат була, башта шуларның берсен үтерә, аннары – моңа шаһит булган икенчесен, дип яза «Комсомольская правда».
Исерек хәлдә булган гаепләнүче ауга барырга чыккан була. Юлда «Mitsubishi Delica» машинасын күреп ала, анда пассажир утыргычында аның танышы була. Ике авто да юл кырыена туктый, танышлар сөйләшергә дип чыга.
Тикшерү ир-атлар арасында конкрет нәрсә булганын ачмый. Аларның талаша башлаганнары билгеле. Сәбәбе сер итеп саклана. Сүз артыннан сүз, һәм, тикшерүчеләр версиясе буенча, гаепләнүче мылтыгын чыгарып танышына ата, һәм ир-атның күкрәгенә тия.
Нидер булуын сизенеп алган «Mitsubishi» йөртүчесе дә машинадан чыга. Тикшерү мәгълүматлары буенча, гаепләнүче аны да җинаятенә шаһит булу сәбәпле юк итәргә карар кыла. Ул ир-атның муенына ата. Аннары машинага утырып китә. 2 зыян күрүче дә урында ук үлә. Аларның гәүдәләрен очраклы шаһитлар тапкан.
Җинаятьчене тиз арада ачыклап, тоткарлыйлар. Җинаять эше «Үтерү, ягъни башка җинаятьне яшерү максаты белән 2 кешене үтерү» маддәсе буенча кузгатылган. Максималь җәза – гомерлеккә ирегеннән мәхрүм итү.
«Җинаять эше буенча тикшерү һәм башка процессуаль гамәлләр үткәрелде, аларның нәтиҗәләре фигурантка инкриминацияләнә торган җинаять кылуда гаепләү белдерергә мөмкинлек бирде. Тикшерү үтенече буенча суд тарафыннан аңа карата сак астына алу рәвешендә чик кую чарасы сайланды», – дип хәбәр итте Россия Тикшерү комитетының Хабаровск крае һәм ЕАО буенча Тикшерү идарәсенең рәсми вәкиле Дарья Немцева.
Төбәк прокуратурасы мәгълүматлары буенча, җинаять эше, карау өчен, Хабаровск край судына җибәрелгән.