«Исәнме икән – кереп карагыз әле». Ярсыган ир 10 ел бергә яшәгән хатынын үтергән
Иркутск өлкәсендә яшәүче ир-ат 10 ел бергә яшәгән хатынын үтергән. Аны 8 елга колониягә хөкем иткәннәр. Бу турыда «Комсомольская правда» яза.
Фаҗига Шелехов шәһәрендә былтыр августта була. Күп катлы йорттагы бер фатирда ир хатынын үтерә. 46 яшьлек ир-ат күршеләренә шакый, ул исерек була.
«Хатыным исәнме икәнен тикшереп чыгыгыз әле», – ди ул күршеләренә.
Ир-ат исерек килеш хатыны белән талашуын, аннары хатынын муеныннан тотып алуын һәм сулыш алудан туктаганчы кысып тотуын сөйләп бирә.
Күршеләр куркуга кала, «ашыгыч ярдәм»гә һәм полициягә хәбәр итә. Урынга килгән табиблар хатынның үлемен раслый.
«Тикшерүчеләр ачыклаганча, ир-ат бу хатын белән 10 ел бергә яши. Соңгы елда алар хәмер белән мавыга, шуннан соң талашалар», – дип сөйләгәннәр Тикшерү комитетында.
Ир-атка карата «Үтерү» маддәсе буенча җинаять эше ачыла. Ул гаебен таный. Суд, тупланган дәлилләр җитәрлек, дип таба һәм гаепләү карары чыгара. Ирне 8 елга ирегеннән мәхрүм итәләр, диелә хәбәрдә.