Шупашкарта авалхи автомашинăсен куравĕ иртрĕ
Пĕриншĕн – тимĕр-тăмăр, теприншĕн – чун киленĕçĕ. Шупашкарти «Амазони» этнокомплексра авалхи автомашинăсемпе мотоциклсен куравĕ иртрĕ. Вун-вун теçетке каялла çула тухнă техникăпа кăсăкланакансен уявне Чăваш Ен, Чĕмпĕр, Тутарстан, Мордва, Марий Эл тата ытти тăрăхри хастарсем хутшăнчĕç. Мĕнлерех вăл, пуян историллĕ машинăпа паянхи кун çÿреме? Çакна Юлия Адюкова репортёр тишкерчĕ. ЮЛИЯ АДЮКОВА: «Волга», «Копейка» тата çакнашкал ытти кăсăклă машинăпа куравра туллин паллашма пулать. Пĕлетĕр-и, вĕсемпе паян кăсăкланаççĕ çеç мар, вĕсемпе паян çÿреççĕ те иккен. Çакнашкал курав иртнĕ вăхăтпа паянхи пурнăçа çыхăнтарать». Авто, мото тата авалхи техника фестивалĕ кăçал Шупашкарта 11-мĕш хут иртрĕ. Унта хутшăнакансемшĕн авалхи машинăсене пĕр вырăна пуçтарасси – чун киленĕçĕ çеç мар, вăл пурнăçăн пĕр пайĕ те иккен. Çак хăйнеевĕрлĕ ăсталăхпа Шупашкарта пурăнакан Юрий Миллин, сăмахран, 10 çул кăсăкланать. Курава вăл «Зим» машинăпа килсе çитнĕ. 1956-мĕш çулта туса кăларнă транспортпа хăй вăхăтĕнче паллă çынсем çӳренине пĕлтерет. ЮРИЙ МИЛЛИН: «Унпа çÿренĕ министр çумĕсем. Вăл 6 вырăнлă. Эпĕ çак машинăна Ижевск хулинчен тупса илтĕм, 7-8 çул каяллах. Вăл ман гаражра ларчĕ. Эпĕ ăна васкамасăр, майĕпен-майĕпен ремонт туса пĕтертĕм. Çынна тĕлĕнтерес тесе мар ĕнтĕ, пĕчĕк чухнех техникăпа кăсăкланнă. Мотоцикл пурччĕ çамрăк чухне. Вăл ялан пăсăлатчĕ. Ăна ремонт тăваттăмăрччĕ, татах пăсăлатчĕ. Çавăн хыççăн интересленме пуçларăмăр». Совет вăхăтĕнче кашни çынах çакнашкал автотехникăна ларса курма ĕмĕтленнĕ. Ачалăхпа çамрăклăхри шухăшĕсене хăшĕ-пĕри куравра пурнăçа кĕртме пултарчĕ. ВИКТОР ФЕДОТОВ: «Хам питĕ кăсăкланатăп тĕрлĕ ретротехникăпа, çавăнпа ачапа килсе курас терĕм. Хам питĕ ӳкерме юрататăп, камера çине фотосем ӳкертĕм, видеосем. Ытларах «Волга» машинăсем килĕшрĕç». Куравра 60 ытла техникăпа паллашма май пулчĕ: çак шутра тимĕр утсем те, мотоциклсем те, велосипедсем те. Ретро пурнăçпа кăсăкланакансемшĕн çак кун чăн-чăн уявпа пĕр тан пулчĕ. Ахальтен мар вĕсем çакнашкал мероприятисенче «тăван анне патĕнче пулнă пек вăй-хал илетпĕр» терĕç. Юлия Адюкова, Бахтияр Велиев