Данир Сабиров кара тәнле кызга өйләнү турында хыялланган булган
Пермь якларында концерт куйганда,юмор остасы, артист Данир Сабиров тамашачылары арасында кара тәнле кызны күреп, сәхнәгә чакырып чыгарган. Ул аннан башта – татарча, аңламагач, инглизчә исемен сорый. «Татарча яки русча беләсезме?» – дип кызыксына.
Замбиядән килгән Нгамбо исемле кыз үзенең русча аз гына белүен, биредә әле 1 ел гына яшәвен, иренең татар икәнлеген әйтә.
«Я тоже такую экзотику хотел... Но, не осмелился. Хотя бы кочаклап карасам? Ә ирең мондамы?» – дип халыкны көлдерә Данир, уенын-чынын бергә кушып.
«Кап-кара, чиста күңелле киленегезгә алкышлар. Чит ил кызлары белән сөйләшсәм дә, энергия кереп китә. Аңламаганыңны беләм, тик белгән кебек тыңла инде, яме», – дип, татарча өйрәнергә кушып төшереп җибәргән сәхнәдән Данир Исламбаевич кара тәнле кызны.
Әлеге видеоны Данир Телеграм-каналына куйды. «Яңа дөньякүләм дәрәҗәгә чыгабыз. Пермь өлкәсе Сарста булды бу хәл. Күземә күренә дип торам, тамашачылар арасында бер мөләем, «импортный» апа утыра. Кыскасы, безнең килен булып чыкты», – дип яза ул.
Сүз уңаеннан, Нгамбо – Пермь өлкәсе Седяш авылы килене. «Интертат» Седяш авылы егете Марат Дәүләевның кара тәнле кызга өйләнүе һәм аларның әти-әни булуы турында язган иде. Нгамбо Россиягә кайтканчы Африкада башлангыч сыйныфлар һәм музыка укытучысы булырга укыган. Россиягә күчү сәбәпле, ул укуын ташлаган. Ул – Марат Дәүләевның икенче хатыны. Блогерның беренче хатыны Кент та кара тәнле кыз иде.
- Татар егете Марат Дәүләев белән Африка кызы Нгамбоның никахы булды
- Африка кызына өйләнгән татар егете Марат Дәүләевнең кызы туган
- Пермьдә туып-үскән татар егете Африкадан алып кайткан хатынына кар көрәтә