Кырымга ял итәргә килгән Татарстан табибы үлем хәлендә булган малайны коткарган
Сарман район үзәк хастаханәсенең Җәлил бистәсе медицина часте җитәкчесе, Кырымда ял иткән чакта, бер баланы коткара. Суга баткан бала клиник үлем кичерә. Татарстан табибы Евгений Окшин аңа ярдәм күрсәтә. Бу турыда «Татар-информ»га Татарстан Сәламәтлек саклау министрлыгында хәбәр иттеләр.
Судан чыгарганда, 9 яшьлек малайда яшәү билгеләре булмый, клиник үлем халәте күзәтелә. Суда баланың эпилепсия өянәге башлана, аннары йөрәге һәм сулыш алуы туктый.
«Яр буенда Евгений Окшин реанимация чаралары үткәрә. 15 – 20 минут чамасы малайның тормыш функцияләрен торгыза»,– диелә хәбәрдә.
Шулай итеп баланы терелтә һәм ашыгыч ярдәм табибларына тапшыра. Хәзер малайның гомеренә куркыныч янамый.
Кырым Республикасының Иҗтимагый палатасы рәисе Александр Форманчук Татарстан табибына рәхмәт белдергән, диелә хәбәрдә.