Следж-хоккей енĕпе турнир иртрĕ
.jpg)
Чăваш Енре следж-хоккей енĕпе регионсен хушшинчи турнир иртрĕ. Ăна «Это чудо» ыркăмăллăх фончĕ пулăшнипе йĕркелерĕç. Ăмăртăва Шупашкарти «Атăл», Самарăри «Ракета», Балаковăри «Форсаж» тата Альметьевск хулинчи «Нефтяник» ушкăнсем хутшăнчĕç. Турнир финалне пирĕн пултарулăх ушкăнĕ те хутшăнчĕ. Тĕплĕнрех Юлия Адюкова репортёр каласа парать.
Чăваш Енре «следж-хоккей» сăмаха 5 çул каялла анлă усă курма пуçларĕç. Шăпах ун чухне республикăра çак спорт тĕсĕн ушкăнĕ йĕркеленнĕ. Халĕ çамрăк хоккеистсем ятарлă çунасем çинче çирĕп ярăнаççĕ çеç мар, хăйсен çитĕнĕвĕсемпе те савăнтарсах тăраççĕ. Регионсен хушшинчи турнирта вĕсем лайăх кăртартусемпе палăрса финала тухнă. Пĕрремĕш вырăна çĕнсе илессишĕн пирĕн спортсменсем «Форсаж» ушкăнпа пăр çинче тĕл пулчĕç. Вăйăн пĕрремĕш тапхăрĕнче ăнăçу Сарă ту спортсменĕсене ытларах йăл кулчĕ. Куракансен хавхалантарăвĕ «Атăл» ушкăна та пуç усма памарĕ.
МИЛА ЧУРБАНОВА: «Ман ача шайба кĕртсе ячĕ. Ку пĕрремĕш шайба мар ку турнирта пирĕн. Пĕрремĕш кунне 4 шайба кĕртрĕ, эпир çĕнтертĕмĕр тутарсене, ĕнер вăл 5 шайба кĕртсе ячĕ тутарсене».
Регионсен хушшинчи турнира Владимир Потанинăн ыр кăмăллăх фончĕн «Вăй спорчĕ» программи пулăшнипе ирттереççĕ. Тĕрев кӳрекенсен хастарлăхне ачасем те кулленех туяççĕ.
ЮЛИЯ АДЮКОВА: «Вăйăн юлашки минучĕсем уйрăмах хĕрӳ пулчĕç. Чăваш Ен ушкăнĕшĕн вылякан Демид Чурбанов çине-çине голл кĕртрĕ. Анчах та, çак хастарлăх табло çинчи шута танлаштарма май памарĕ. Çапах та, спортсменсем кулянмаççĕ, çакнашкал вăйăсенче чи пĕлтерĕшли вăл туслăх тесе палăртаççĕ».
Вăйă вăхăтĕнче ачасем пĕр-пĕринпе тупăшаççĕ пулсан, матч вĕçленсенех вĕсем хирĕç тăни çинчен манса каяççĕ тейĕн.
ДАНИЛА ПИТЕРКИН: «Йывăр пулнă, соперник питĕ вăйлă пулчĕ, анчах эпир кулянман. Хăш-пĕр чухне пулать çывăраймастăп та, шуталаса выртатăп вара. Кайран ирхине килетпĕр тренировкăна. Эпĕ питĕ савăнатăп, мана хоккей вылянă хыççăн питĕ лайăх, кăмăллă пулса каять».
Хăвăртлăха, хастарлăха палăртса турнирта Сарă ту тăрăхĕнчи «Форсаж» ушкăн пĕрремĕш вырăна тухрĕ. Ăмăрту хуçисем, «Атăл» ушкăн спортсменĕсем вара кĕмĕл медальсене тивĕçрĕç. Виççĕмĕш вырăна Тутар Республикинчи «Нефтяник» ушкăн çĕнсе илчĕ.