Татарстанда яшәүче ир-атның үңәчен балык кылчыгы ерткан
56
Татарстан Республика клиник хастаханәсе табиблары 51 яшьлек ир-атны коткарган. Аның үңәчен балык кылчыгы ерткан булган. Бу турыда «Татар-информ» хәбәр итте.
Ир-ат хастаханәгә үзе мөрәҗәгать иткән. Ул муенында көчле авырту булуын, азык йота алмавын әйтә. Табиблар ФГДС ясамакчы була, тик эндоскоп эчкә узмый. Шуннан соң табиблар ачыклаганча, чит предмет аркасында ир-атның үңәче ертылган.
Көн ярым элек бу ир-ат уха ашый һәм тончыга. Шул чакта аның үңәченә балык кылчыгы кадалып кала.
Балык кылчыгын алу өчен кисем ясарга туры килә. Табиблар ир-атның муенына кечкенә генә кисем ясап, сөякне чыгара. Хәзер ул үзен яхшы хис итә, әлегә зонд аша гына туклана, аның үңәче төзәлгәнен көтәләр.
Табиблар балык ашаганда сак булырга чакыра.