Тямаевның якташы, «Слово пацана» фильмында уйнаучы актер: «Нурлат пацаннарына сәлам»
Татарстанның иң дәртле җырчысы Фирдүс Тямаев, блогер Искәндәр Гайсин якташлары – хәзерге вакытта иң популяр сериалларның берсе «Слово пацана»да Марат ролен уйнаучы Рузил Минекаев белән Мәскәүдә очрашкан.
Җырчы үзе төшергән видеода «Нурлат егетләре Мәскәүдә очраштык. Яшь, талантлы егетебез топ-кинода катнаша. Энекәшкә уңышлар телибез, Нурлат исемен күтәреп йөрсен. Татарстаннан, Нурлаттан сәлам», – ди ул.
«Нурлат пацаннарына сәлам», – ди Рузил Минекаев.
Аннары Фирдүс Тямаев «Слово пацана» сериалындагы рольгә дә кереп карый. «Син хәзер – пацан! Син хәзер урам белән! Калганнары – синең дошманнар», – дип кабатлый. Тик якташы аны: «Фирдүс абый, алай түгел», – дип туктата.
«Класс! Якташлары өчен нинди горурлык», – дип язган үзе дә Нурлат кызы, блогер Гөлия Вәлиәхмәтова.
«Татар малайларын күрергә бигрәк күңелле»;
«Мишәрләр, алга»;
«Бигрәк матур егет. Бик бәхетле булсын»;
«Яхшы, матур малай. Үз ролен шәп уйнады», – кебек комментарийлар калдырган фильмны караучылар.