Автор-башкаручы Гүзәлия: «Иң зур үкенечем – бала булмау»
Татар эстрадасы өчен күпсанлы хитлар иҗат иткән, композитор, автор-башкаручы Гүзәлия «Татарстан – Яңа гасыр» каналындагы «Сөйләшергә вакыт» тапшыруында кунак булды.
Тапшыруны алып баручы Лилия Кадыйрова кунакка хыялы һәм үкенече турында да сорау бирде.
«Үз йортым белән яшәргә омтылыш бар, үз йортым турында хыялланам, бер эт алып җибәрәсем килә. Берничә тавык алырга уйлыйм, мин авыл кызы бит. Берничә түтәл суган, кыяр, помидор, җиләк үстерәсем килә. Барыбер җир үзенә тарта ул, 40 яшьтән узгач, җир тарта башлады.
Иң зур үкенечем – бала булмау. Моны кабул иттем, дип әйтеп булмый, мин бу проблемага карата мөнәсәбәтемне үзгәрттем. Һәрбер эш вакытында эшләнергә тиеш. Бала табуның да үз вакыты бар. Соңга калырга тырышмагыз, өлгерергә тырышыгыз, яратырга, бала табарга, үстерергә, эшләргә дә, үзегезне дә яратырга», – дип сөйләде Гүзәлия.