Кайсы очракта теплица өчен салым түләргә кирәк?
Әгәр бакчада фундаметлы теплица булса, һәм ул документта теркәлмәгән икән, моның өчен штраф яный. Массакүләм мәгълүмат чараларында капиталь һәм сүтелә торган теплицалар турында аңлашылмаучанлык килеп чыгуга юрист Илья Русяев игътибар итте, дип яза «Татарстан» ДТРК.
Капиталь теплицалар сүтелә торганнарыннан фундамент булу белән генә аерылмый. Алар стационар су сибү системалары белән җиһазландырылган, җылытыла һәм яктыртыла, шулай ук «бетон юллар яки беркетү аша» җиргә береккән.
Кадастр исәбенә башка капиталь корылмаларны да куярга кирәк – мунчалар, хуҗалык блоклары, җәйге кухнялар, сарайлар. Аларның барысына да салым салына.
«Капиталь күчемсез милекне теркәү бурычы инде күптән бар. Күчемсез милеккә теркәлмәгән өчен штраф 1,5 мең сумнан башлана. Әмма аны куллану өчен төзелешнең теркәлергә тиешлеген һәм яңа нормалар үз көченә кергәннән соң төзелгәнлеген исбатларга кирәк», – дип билгеләде белгеч.
Шул ук вакытта теркәлү булмау объектны сатканда һәм аны мирас итеп тапшырганда проблемаларга китерергә мөмкин. Шул ук вакытта ЕГРНда теркәлгән, әмма мәйданы 50 квадрат метрдан ким булган капиталь хуҗалык корылмаларына салым салынмый.
Һәр төбәкләр тиешле ташламаларны өстәмә рәвештә киңәйтә ала, дип билгеләде юрист.