Дамира Сәетовага халык артисты исеме бирелде
Бу хакта «Нур» театрының «ВКонтакте»дагы төркеме хәбәр итә.
Х.Әхмәтов исемендәге Башкортстан дәүләт филармониясендә узган «Ике аккош» республика конкурс-фестивалендә «Нур» театры артистлары Дамира Сәетовага – Башкортстанның халык артисты, Эльмир Газизуллинга Башкортстанның атказанган артисты исемнәре бирелде. Аларны Башкортстан Республикасы Хөкүмәтенең Премьер-министры урынбасары Ирек Сәгыйтов бүләкләде.
Фото: © Роман Шумный
Әлеге югары дәүләт бүләкләре легендар шәхесләр Фәридә Кудашева һәм Бәхти Гайсин иҗатына багышланган «Ике аккош» Бөтенроссия музыкаль конкурсының нур өстенә нуры булды. 9 ел дәвамында Башкортстан татарлары милли-мәдәни автономиясе тарафыннан оештырылучы әлеге бәйге төрле төбәкләрдән музыка уен коралында уйнаучыларны һәм җырчыларны берләштерә, дип хәбәр ителә театрның ВКонтакте челтәрендәге аккаунтында.