Блогер Рөстәм Нәбиев хәер сорашучы ролендә социаль экспериментта катнашкан
Уфа блогеры Рөстәм Нәбиев, хәер сорашучы ролендә, социаль экспериментта катнаша. Бәхетсезлек очрагы аркасында ике аяксыз калып, инвалид коляскасында йөрергә мәҗбүр булса да, төшенкелеккә бирелмәгән, спорт белән шөгыльләнүче, менә дигән гаилә башлыгы Рөстәм Нәбиевне «үзгәртү» өчен, хәтта, гример да чакырганнар.
Санаулы минутлар эчендә Рөстәмне чәчләре җиткән, сакал-мыегы күптән кырылмаган, таушалган өс-башлы абзыйга әверелдереп куйганнар. Йөзенә җиңелчә генә «яралар» ясаганнар. «Дөреслекнең чишелү» ихтималы булганга, Рөстәмнең ап-ак тешләренә кадәр саргайтканнар.
Рөстәм әлегә экспериментның нидән гыйбарәт булуын күрсәтмәде. Хәер сорашучы образында Уфаның җир асты юлларыннан күтәрелгәннән соң, «Порше»сына утырып китеп барган видеосын гына куйды.
Рөстәмнең образына карата беренче комментарийлар да килә башлаган. «Үзеннән тыш Динарасы һәм Иринасы да барлыгын белеп, Индира Рөстәмне өйдән куып чыгарган», – дип язганнар аңа.